Подворье Патриарха Московского и всея Руси храма Покрова Пресвятой Богородицы в селе Покровском

Икона Пресвятой Богородицы «Боголюбская» Московская

празднование 18 июня / 1 июля

Тропарь, глас 1

Боголюбивая Царице,/ неискусомужная Дево Богородице Марие!/ Моли за ны Тебе Возлюбившаго/ и рождашагося от Тебе Сына Твоего Христа Бога нашего,/ подати нам оставление прегрешений,/ и мирови мир, земли плодов изобилие,/ пастырем святыню/ и всему человечу роду спасение./ Грады наша и страны Российския от нахождения иноплеменных заступи/ и от междуусобныя брани сохрани./ О Мати Боголюбивая Дево!/ О Царице Всепетая!/ Ризою Твоею покрый нас от всякаго зла,/ от видимых и невидимых враг защити,// и спаси души наша.

Кондак, глас 3

Дева днесь предстоит Сыну,/ руце Свои к Нему простирающи,/ святый князь Андрей радуется,/ и с ним Российская страна торжествует,/ нас бо ради молит Богородица// Превечнаго Бога.

Величание

Величаем Тя, Пресвятая Дево, и чтим образ Твой святый, егоже благоверный князь Андрей даде нам на враги в победу и всем верным во спасение.

Акафист Пресвятой Богородице перед Ея иконой, именуемой «Боголюбской»

Кондак 1

Взбранной Воеводе, Боголюбивей Царице, превысшей всякаго создания, Деве и Матери Христа Бога, похвальная восписуем ти раби Твои, Богородице! Ты же, яко Боголюбивая и Всемилостивая Мати, благоизволившая явити пресветлый Свой лик благоверному нашему князю Андрею, от бед и скорбей сохрани ны и храм сей, да зовем Ти: Радуйся, Боголюбивая Царице Богородице, Надеждо и Прибежище наше.

Икос 1

Ангелов превысшую вся Небесныя Силы величают Тя, Богородицу Царицу, мы же грешнии на земли, чудному Божию о Тебе смотрению дивящеся, всею душею, сердцем и устнами дерзаем глаголати: Радуйся, благословенная в женах Дево Благодатная; радуйся, Всевышняго Мати, Духа Святаго пребывание. Радуйся, Царице Небесе и земли и всех Небесных Сил высшая; радуйся, ангелы чтимая, от серафим воспеваемая. Радуйся, благословляемая на Небеси и славимая на земли; радуйся воистинну Присноблаженная и Пренепорочная. Радуйся, Боголюбивая Царице Богородице, Надеждо и Прибежище наше.

Кондак 2

Видящи Премилосердная Матерь Божия земное скорбное житие наше, немощи и болезни, благоизволи явити чудо, избрав сосуд благодати и милостей Своих к нам — благочестиваго князя Андрея. Обаче и мы с радостию несказанною припадаем к Тебе, Владычице, и из глубины души благодарим Тя, нашу дивную Заступницу, воспевающе Богу: Аллилуиа.

Икос 2

Разумети хотя чудо, явленное милостию Твоею, Пресвятая Богородице, егда кони, везшии святый образ, сташа и людие к шествию подвигнути их не возмогоша, благоверный князь Андрей нача со слезами молитися к Тебе, Владычице, да покажеши, Пречистая, волю святую Свою, Ты же в видении благоволила еси открыти преблагий совет Твой. Темже и мы, чудо сие воспоминающе, преклоньше колена, взываем сице: Радуйся, прославившая место обители Твоея дивным чудодействием и в сем милость преизобильную нам показавшая; радуйся, страну Владимирскую светом Своим озарившая и лучи света на всех нас простирающая. Радуйся, всеблагая наша Наставнице, любовию нас привлекающая; радуйся, Охранительнице наша от бед и болезней. Радуйся, у Господа спасения нашего Ходатаице, Царице наша Небесная; радуйся, за вся благодеяния Твоя благодарению нас научающая. Радуйся, Боголюбивая Царице Богородице, Надеждо и Прибежище наше.

Кондак 3

Сила Вышняго осеняет всех, с верою и благоговением притекающих к Тебе, Пречистая Госпоже Богородице, и уповающих на Твою милость; понеже всякое благое прошение приемлеши тепле. Благоверный князь моляше Тя, Владычице, явити волю Твою, преисполнився трепета пред таинством Твоего о нем произволения. Такожде и мы к Тебе, Пречистая, прибегаем, умиленно вопиюще: всемилостивая Покровительнице наша, научи и нас прославляти всечестное и всехвальное имя Твое и достойно воспевати Богу: Аллилуиа.

Икос 3

Имеяй на пути, яко Боготечную звезду, честный образ Твой, Владычице, благоверный князь в прилежней молитве своей пред чудотворною Твоею иконою сподобися яве узрети Тя, Царицу Небесную, и теплое ходатайство Твое Богу приносящую о месте явления Твоего и о всем мире. О, Божия Мати, Пречистая Богородице! Со умилением припадаем к Тебе и, богатыя Твоея милости ожидающе, умильно вопием Ти: Радуйся, Радосте наша и крепкая Заступнице; радуйся, Покрове наш и наше Утешение. Радуйся, Охранительнице наша и наше Упование; радуйся, Отрадо наша и дивное о нас попечение. Радуйся, Похвало наша, чудесы нас удивляющая; радуйся, Прибежище наше и залог вечнаго спасения. Радуйся, Боголюбивая Царице Богородице, Надеждо и Прибежище наше.

Кондак 4

Недоумевает ум наш, како достойно есть восхвалити Тя и дивное явление Твое, Пресвятая Владычице: яко солнце лучи испущающи, предстала еси молящемуся князю и тако рекла еси: “Не хощу, да образ Мой несеши в Ростов, но во Владимире постави Его: на сем месте во Имя Моего Рождества церковь воздвигни и обиталище иноком состави”, и, воздевши Свои Божественнеи руце ко Владычнему образу, скрыся от духовных очес его. Преклоняем и мы колена пред Тобою, Боголюбивая Мати, и Твоя чудная явления и веления разумеюще, из глубины души воспеваем Богу: Аллилуиа.

Икос 4

Слыша Господь моления Твоя, Богоизбранная Царице Небесная, обеща выну исполняти, яко Преблагия Матере, прошения Твоя. Ты же, о Владычице, тогда рекла еси ко Господу усты Своими: “Владыко Многомилостиве, Господи, Иисусе Христе, Сыне и Боже Мой, молю Тя, да пребудет Божественная благодать на людех Твоих, и светозарный луч славы Твоея да нисходит всегда на место сие, Мною избранное”. Истинно исповедуем, о Пречистая, яко скоро помогаеши с верою к Тебе прибегающим и, со умилением воспевающе Тебе, зовем сице: Радуйся, Молитвеннице наша пред Господем и Сыном Твоим; радуйся, Заступнице всего рода человеческаго и Защитнице народа православнаго. Радуйся, Матернюю любовь Твою всегда нам являющая и вся благая нам дарующая; радуйся, радости нам, благодати же и славы вечная Ходатаице, дивная наша Утешительнице. Радуйся, бытие обители и ниспослание на ню благодати предвозвестившая; радуйся, в память Твоего явления храм во славу Рождества Твоего устроити указавшая и тамо церкви Христовой дивное украшение явившая. Радуйся, Боголюбивая Царице Богородице, Надеждо и Прибежище наше.

Кондак 5

Яко лучезарную звезду, в пределах Владимирских явленную, узре князь Андрей пресветлый образ Твой, Владычице, и в явлении сем уразумев знамение велия попечения Божия о месте явления Твоего, даде ему имя “Боголюбивое”. О Царице и Владычице! Освети и нас светом Твоим Небесным, сохраняющи нас под кровом Твоим благим, услыши всеумиленныя молитвы восхваляющих Тя и воспевающих Богу: Аллилуиа.

Икос 5

Видение чудное Богоматере и святая словеса Ея приемля с радостным трепетом, благоверный князь умиленно со слезами паде на землю и сладостно возблагодари Всевышняго, яко сподобися узрети Тя, Пресвятую Богородицу. Посем ускори церковь заложити, идеже ныне Боголюбивая обитель, именем Твоим красуяся, молится за весь мир пред Пречистым Твоим образом. Созерцающе в таковом событии знамение благодати, дерзаем воспевати сице: Радуйся, Милостивая, яко устроила еси тихое пристанище ищущим спасения; радуйся, Пресветлая, яко свет подаваеши всем хотящим жити в преподобии, и тем показуеши правыя стези к Царствию Небесному. Радуйся, Теплая Ходатаице о живущих в обителех Твоих, милость Свою выну им обещавшая; радуйся, яко в трудех иноческих им всегда помогаеши и к трудолюбию поощряеши. Радуйся, яко в келлиях монашеских на молитву вразумляеши и к добродетельному житию ревностно возбуждаеши; радуйся. Хранительнице дивная обителей святых, яко Твоею благодатною силою оныя зиждятся и преуспевают в благочестии. Радуйся, Боголюбивая Царице Богородице, Надежде и Прибежище наше.

Кондак 6

Проповедует вся земля Российская богатая милости Твоя, Владычице, и дивное благодатное князя Андрея вразумление. Сему последуя, благоверный князь повеле образ написати тем подобием, яко же ему явися Пречистая, и, обрет святую икону, поклонися, радостно со слезами благодаря Бога и скорую нашу Помощницу, взывая: Аллилуиа.

Икос 6

Возсия благодать неизреченная от цельбоносныя иконы Твоея, Пресвятая и Боголюбивая Мати. Слышим и видим величие чудес, от нея бываемое, со удивлением взираем на сию икону, яко на Пресветлое лице Самой Пречистой Девы. О Госпоже, Царице и Владычице! Ты выну воздвизаеши руце Твои на моление за нас пред Сыном Твоим, не презри и вопиющих Ти похвальная сия: Радуйся, во утешение нам даровавшая образ Твой чудотворный; радуйся, новую милость и новую благодать сим в Церкви являющая и тем путь спасения показующая. Радуйся, Покровительнице наша, от бед нас спасающая и в скорбех быстрое облегчение нам посылающая; радуйся, сострадательнейшая к болезнем нашим, скорую помощь нам подающая. Радуйся, Боголюбивая Царице Богородице, Надеждо и Прибежище наше.

Кондак 7

Хотя благоверный князь достойно почтити пресвятую волю Твою, Владычице, собра архиереи, священники и людей множество, да ублажат Тя хвалебно собором. О, чуднаго торжества! О, премудрости судеб Твоих, Владычице! Преславно преносится чудотворная Твоя икона в дивный храм всечестнаго Рождества Твоего. Чудодействием прославляется церковь Твоя, о Госпоже Богородице, и вси предстоящии, радости и умиления исполнении, преклоньше колена, целуют Твой пречистый образ и взывают: О, Мати Боголюбивая, осени всесильною Твоею десницею и нас, воспевающих Богу: Аллилуиа.

Икос 7

Дивна дела Твоя, Владычице! Вси людие, здравии и болящии, богатии и нищии, вси прибегаем к Тебе, сострадательнейшей Матери нашей; не отрини нас от лица Твоего, буди милостива к нам, недостойным рабом Твоим, во всех путех жизни нашея, защити и помилуй от всея души любовию вопиющих Тебе таковая: Радуйся, ненадеющихся надеяние и печальных утешение; радуйся, о скорбящих попечение и бедствующим помоще. Радуйся, алчущих кормительнице и нищих одеяние; радуйся, убогих заступнице и болящих исцеление. Радуйся, старцев покровительнице и юных воспитательнице; радуйся, враждующих примирение и обидимых защитнице. Радуйся, Боголюбивая Царице Богородице, Надеждо и Прибежище наше.

Кондак 8

Дивное чудо пронесения преславныя иконы Твоея, Владычице, торжественно вси чествуем и ежегодно в сей светлый праздник благодарно воспоминаем вся неизчетная благодеяния чудес, Тобою, Пречистая, от иконы дивно источаемых; и тебе, угодниче Божий Леонтие, в помощь призываем, чтуще с любовию честную память твою, да молитвами твоими сподобимся у Пречистыя обрести благодать, еще непрестанно воспевати Господу. Аллилуиа.

Икос 8

Все величие чудес Твоих, Пречистая, несть исчислити возможно, егда безбожный царь Батый, разоряя грады и веси и храмы сожигая, со многою ратию приблизися и ко святей обители Твоей, Пречистая, вниде в церковь и, обрет чудотворную икону, дерзостно положи руку на драгия ризы. Храм со всем богатством огню предаде, точию един образ Твой, Владычице, цел обретеся и ничимже поврежден бысть. О, велие чудо! О, коль дивны знамения у благодати являеши нам, Пречистая! Кто не ублажит Тя? Кто не воспоет Твоя славная чудеса? И мы, грешнии, со умилением взирающе на святую икону Твою, толь чудесно от погибельнаго пламене сохранившуюся, со слезами взываем сице: Радуйся, яко Купина, огнем горевшая и неопальна пребывшая; радуйся, яко благодать Тебе дадеся силу огненную угашати. Радуйся, в годину напастей и испытаний оставившая нам святую икону Свою во утешение; радуйся, яко благостынею Своею угашаеши в нас огнь нечестия пламенем огня Божественнаго. Радуйся, прославившая чудесы икону Твою; радуйся, яко молитвою и целованием иконы Твоея вси мы приемлем благодатное утешение. Радуйся, Боголюбивая Царице Богородице, Надеждо и Прибежище наше.

Кондак 9

Все упование возлагаем на Твою благость, Пресвятая Владычице! Милосердию Твоему несть конца, величие же Твое кто исповесть? Предстоящи с мольбою у Престола Всевышняго, коль многое множество чудес являла еси нам, Пречистая, коль дивно спасла еси славный град Москву от грознаго врага Тамерлана, коль чудно объят его великий страх пришествием Твоим в матерь русских градов и понуди абие отступити со всем воинством. Не умолчим никогда, Заступнице наша преславная, о всех Твоих благодеяниих, да не будет под спудом свет чудес Твоих, и ныне, предстояще пред Пречистым Твоим образом и молящеся умиленною душею и сокрушенным сердцем, взываем Богу: Аллилуиа.

Икос 9

Ветия многовещанныя не довлеют по достоянию воспети хвалу и благодарение Пречистей, како царственный град сохрани от татарских полчищ. Егда вся рать вражия отступаше от предел Московских, царь Иоанн со скорбию и слезами отпусти чудотворный образ Твой, Боголюбивая Владычице, в избранную обитель Твою, идеже со умилением и радостию неизреченною сретоша его людие, и от мала до велика, вси, преклоньше колена, ублажаху Тя, Пречистая. И мы сея радости мысленно причащающеся, Царице Небесней вопием благодарне: Радуйся, премилосердая Утешительнице наша, святую икону дати нам изволившая; радуйся, от нашествия врагов иноплеменных нас дивно спасшая. Радуйся, несокрушимый щите царей наших и отечества благонадежное утверждение. Радуйся, воинства, крепкая защито, от меча вражия сохраняющая; радуйся, от разорения, плена и лютыя смерти святою десницею Твоею всех уповающих на Тя избавляющая. Радуйся, Боголюбивая Царице Богородице, Надеждо и Прибежище наше.

Кондак 10

Спасти хотя свою душу, благочестивый царь Феодор, любовию Божественною разжигаем, добре подвизася, пребывая в посте и в молитве, и, вельми любяще Боголюбивую обитель, часто ю посещаше: единожды же с теплою молитвою пред чудотворною Твоею иконою, Боголюбивая Мати, от усердия своего в дар Тебе принесе носимый на персех своих честный крест, каменьми драгими украшенный. Взирающе на сие дивное украшение иконы Твоея, о Пречистая, радуемся вси духовно о сем, како Тя, Царицу и Владычицу, славят и чтут вси вернии, и молящеся вопием Богу: Аллилуиа.

Икос 10

Стена еси Ты, ограждающая ны от всяких болезней, Пресвятая Богородице, егда со умиленною молитвою призываем в помощь нашу Твое Матернее милосердие. Аще бо Ты не бы предстояла, Боголюбивая Мати, молящи о нас, кто бы нас избавил от смертоносных ран и язв всегубительных! Со умилением созерцаем, како на пути благодатнаго шествия Твоего вси болящии чудесно исцеляхуся и струпи на телесех во мгновение ока врачевахуся. Темже и мы, припадающе к цельбоносней иконе Твоей, молим Тя, Владычице: не остави ны милостию Твоею пребогатою, избави ны от всяких болезней, наипаче же от смертоносныя язвы и пагубы. О Пресвятая Богородице! Благопоспешно спаси нас и помилуй с верою и любовию вопиющих Ти из глубины души: Радуйся, страны нашея православныя дивная Покровительнице, многажды от бед и напастей ю избавлявшая; радуйся, страдальцев благодатным утешением венчающая и расслабленным скорое восставление дающая. Радуйся, слепым прозрение и хромым от недуга их дивное избавление даровавшая; радуйся, пораженных различными недугами и болезнями чудесно исцеляющая. Радуйся, скорбящих родителей в лишении чад их утешающая благодатною Твоею помощию; радуйся, Целительнице наша в страданиях телесных и благая Утешительнице в печалех наших душевных. Радуйся, Боголюбивая Царице Богородице, Надеждо и Прибежище наше.

Кондак 11

Пение благодарственное всеумиленно приносит Тебе, Боголюбивая Мати, вся страна Российская за чудное избавление от смертоносныя язвы, толь гибельно ю поразившия. Светлии дни дивных исцелений начертаны на сердцах верующих, и моления теплыя возносятся ежегодно в память сего радостнаго торжества, егда святая икона Твоя, Владычице, с пении духовными приносится в славный град Владимир. Красуйся и ликуй, благословенный граде! Торжествуйте, правовернии, зряще несомую икону Владычицы, источающую неисчетныя исцеления всем притекающим к ней с верою и любовию! Преклоняем и мы колена пред Тобою, Пресвятая Богородице, величаем Тя и молим: приими милостивно и от нас жертву хвалы и прославления, приносимую Тебе от недостойных раб Твоих, вопиющих Богу: Аллилуиа.

Икос 11

Светозарную икону Твою, Боголюбивая Мати, с благоговением зрим в Божественных храмах Твоих, радующеся. Кто не прибегал к Тебе, Владычице? Кто не покланялся, кто не лобызал Твоя Пречистыя стопы? Кто не умолял Тя, Заступницу нашу? О Пресвятая Дево, приими веру и усердие наше, направи путь наш на стези истины, умоли Господа и Сына Твоего, да спасет нас, имиже весть судьбами, да не погибнем в нераскаянии о наших грехопадениях, и услыши моления к Тебе взывающих: Радуйся, Благодатная, всеми добродетельми преукрашенная, Своею благодатию нас не оставляющая; радуйся, Хранительнице наша, в час смертный тьму вражию отгоняющая и по смерти нас упокоевающая. Радуйся, милостивая, милость Свою нам являющая в день испытания, воньже открыются дела наша, добрая же и злая; радуйся, Милосердая, заступление нам посылающая и тем в будущем вечныя радости сподобляющая. Радуйся, Боголюбивая Царице Богородице, Надеждо и Прибежище наше.

Кондак 12

Благодатию Божественною осеняема, святаго Иоанна Предтечу с лики архангел зрим стоящия окрест Пречистыя Матере Боголюбивыя: вкупе же ублажаем и тя, угодниче Божий, помози нам, немощным, имети веру непоколебиму, ум чист, силы и произволение освящати души наша постом и молитвою и выну полагати хранение устом нашим, да молитвами Владычицы и твоими сподобимся достойно воспети Богу нашему: Аллилуиа.

Икос 12

Поюще неисчетная знамения и чудеса Твоя, Пресвятая Богородице, умиленно припадаем к пречистому образу Твоему, Боголюбивая Мати лобызающе его со страхом и трепетом, хвалим Тя яко неисчерпаемый источник благодати и молим: буди Ходатаица о нас, воздвигни руце к Сыну Твоему, да выну в жизни сей и в будущей милосердие Его неотступно будет с нами, взывающими Тебе: Радуйся, Присноблаженная, паче земнородных ведущая блаженство пребывати с Богом; радуйся, и нас участники сего блаженства соделывающая. Радуйся, Пренепорочная Дево, всецело стяжавшая чистоту, смирение и непорочность; радуйся, дарующая нам благая сия, да будем угодны Тебе и Богу. Радуйся, Всемилостивая Царице, простирающая на нас, грешных, милость Свою во всякое время живота нашего; радуйся, чадолюбивая Мати, дарующая нам Свое Матернее заступление в час смерти. Радуйся, Боголюбивая Царице Богородице, Надеждо и Прибежище наше.

Кондак 13

О, Мати Боголюбивая, Царице Небесная, Всемощная наша предстательнице! Малыя сия услышавши смиренныя мольбы наша, призри на ны милостивым Твоим оком; буди нам скорая Заступница в день кончины нашея и в час смертный явися нам Сама, Пречистая, простирающи руку помощи, отгоняющи духов злобы, ищущих поглотити душу нашу при разлучении от тела, и сподоби нас в будущей жизни в веселии и радовании возвеличити и прославити Тя, яко Преблагую Покровительницу нашу, да спасеннии Тобою в бесконечней веце вопием Богу: Аллилуиа.

(Этот кондак читается трижды, затем 1-й икос и 1-й кондак)

Молитвы к Пресвятой Богородице перед Ея иконой, именуемой «Боголюбская»

Молитва первая

О, Пречистая Госпоже Богородице, Мати Боголюбивая, Надеждо нашего спасения! Воззри милостивно на предстоящия с верою и любовию и покланяющияся Пречистому образу Твоему: приими наше хвалебное пение сие и пролей теплую Твою молитву о нас, грешных, ко Господу, да, презрев вся наша согрешения, спасет и помилует нас. О, Предивная Владычице! Покажи на нас чудныя милости Твоя. Молим Тя умиленно, избави нас от всякия скорби, настави на путь всякия добродетели и благостныни, спаси от искушений, бед и болезней, изми от нас оклеветании и ссоры, сохрани от молниеноснаго грома, от запаления огненнаго, от глада, труса, потопа и смертоносныя язвы: подай нам Свою милостивную помощь на пути, в мори и на суше, да не погибнем люте. О, Всемилостивая, Боголюбивая Мати, с твердым упованием возсылаем к Тебе нашу смиренную молитву! Не отрини наших слез и воздыхании, не забуди нас во вся дни живота нашего, но всегда пребывай с нами и Твоим заступлением и ходатайством у Господа подаждь нам отраду, утешение, защиту и помощь, да выну славим и величаем Преблагословенное и Всепетое Имя Твое. Аминь.

Молитва вторая

О, Чудная и Высшая всех тварей Царице Богородице, Небеснаго Царя Христа Бога нашего Мати! Услыши нас, грешных и недостойных раб Твоих, в час сей молящихся и припадающих к Тебе с воздыханием и слезами и умильно глаголющих; изведи нас от рова страстей, Владычице; избави нас от всякия скорби и печали; огради от всякия напасти и злых клевет, от неправедного и лютаго навета вражия. Можеши бо, о Благодатная Матерь наша, не точию от всякаго зла сохранити люди Твоя, но и всяким благодеянием снабдити и спасти: разве Тебе иныя Предстательницы в бедах и обстояниих и теплыя Ходатаицы о нас, грешных, не имамы к Сыну Твоему, Христу Богу нашему, Егоже умоли, Владычице, да спасеннии Тобою славим и в будущем веце Всесвятое Имя Сына Твоего и Бога нашего, купно со Отцем и Святым Духом, ныне и в бесконечныя веки. Аминь.

Историческая справка

В 1157 году святой благоверный великий князь суздальский Андрей Юрьевич (Георгиевич) Долгорукий, один из первых собирателей и строителей Российской земли, нареченный за благочестие Боголюбским, покинул Выш-город (в окрестностях Киева, раздираемого в то время княжескими междоусобицами и народными волнениями, страдающего от нападений половцев) и направился на свою родину, в Ростово-Суздальскую землю. Там, на русском Севере, его трудами было заложено основание святой Руси — будущего Православного Московского царства.
Святому князю Андрею сопутствовала чудотворная икона Божией Матери, написанная, по преданию, святым апостолом и евангелистом Лукой, нареченная впоследствии “Владимирской” и ставшая покровительницей всей Российской земли. 18 июня примерно в десяти верстах от Владимира повозка с иконой внезапно остановилась без видимых причин, и лошади не могли сдвинуть ее с места (икос 2). Святой князь Андрей приказал совершить молебное пение в честь Божией Матери перед Ее чудотворной иконой, потом молился уединенно в шатре. Во время усердной молитвы ему явилась Сама Царица Небесная и повелела чудотворную икону поставить во Владимире, а на сем месте устроить храм и монастырь в честь Ее Рождества. Помолившись явившемуся Сыну Своему о месте сем и о всей Российской земле, Она сделалась невидимой (икос 3, кондак и икос 4).
Вдохновленный явлением Богоматери, святой князь Андрей повелел написать на кипарисовой доске икону Божией Матери, изобразив Пречистую Деву такою, как Она явилась ему, и на сем месте богоугодном, полюбившемся Небесной Владычице, построить белокаменную церковь Рождества Богородицы и основать монастырь, названный вместе с возникшим рядом городом Боголюбивым (кондак и икос 5, кондак 6). На иконе Богоматерь изображена стоящею с поднятыми в молитве руками и ликом, обращенным к явившемуся Ей Господу Иисусу Христу. В правой руке Богородица держит хартию с Ее молитвой к Сыну Своему: да благословит Он место сие, Ею избранное. Над образом Пречистой Девы помещены клейма пяти икон, сопутствовавших святому князю Андрею в путешествии из Вышгорода в Ростово-Суздальскую землю: Спасителя, Божией Матери (Владимирской Ее иконы), святого Пророка, Предтечи и Крестителя Господня Иоанна, Архангелов Михаила и Гавриила (кондак 12).
Новонаписанная икона была торжественно перенесена в воздвигнутый храм Рождества Пречистой Богородицы и названа Боголюбивою, или Боголюбскою (кондак 7).
Во время монголо-татарского нашествия хана Батыя (1237-1240) храм в честь Рождества Богородицы был сожжен, один только Боголюбский образ Божией Матери по воле Божией чудесно сохранился в огне невредимым. Когда в 1395 году на Русь обрушилось стремительное нашествие Тамерлана и никакие земные усилия не могли спасти российские княжества от полного разорения, “Матерь градов русских” Пречистая Богородица явилась в видении грозному завоевателю и приказала ему покинуть Русскую землю (кондак 9). Сохранилась память о том, что в 1432 году великий князь Московский Василии Васильевич Темный (1425-1462) поставил список Боголюбской иконы в Сретенском храме своего дворца, а благочестивый царь Феодор Алексеевич Романов (1676-1682) часто посещал Боголюбивую обитель и в 1680 году приложил к чудотворной иконе свой золотой крест, украшенный драгоценными камнями (кондак 10).
Особенно прославилась Боголюбская икона чудесами исцеления и предохранения от губительных эпидемий чумы и холеры (икос 10). В 1771 году во Владимире свирепствовала чума, и по просьбе жителей чудотворную икону 22 октября с крестным ходом, в сопровождении множества народа внесли в город и обнесли его кругом, после чего мор совершенно прекратился. С этого времени в память чудесного избавления от чумы было установлено ежегодно совершать крестный ход с Боголюбской иконой во Владимирский Успенский собор 21 мая, после чего в течение 26 дней ее носили по домам, три раза обносили вокруг города, и 16 июня, накануне празднования в ее честь, с крестным ходом икона торжественно возвращалась в Боголюбов монастырь (кондак 11).
Глубокое почитание чудотворной Боголюбской иконы народом российским засвидетельствовано написанием множества копий с нее, воспринявших благодатную силу древнего образа. Прекращением смертоносных эпидемий, особенно чумы и холеры, и исцелениями прославились Угличский в 1654 году, Московский, Тульский, Козловский и Елатемский в 1771 году, Зимаровский и Юрьевский в 1771 и 1848 годах, Усманский в 1831 году, Тарусский в 1848 и 1870 годах и другие списки древней чудотворной иконы.

Икона Пресвятой Богородицы «Боголюбская» Московская

Была написана в 1157 году и находилась раньше в Москве на Соляной площади, над Варварскими воротами Китай-города. Чудотворный образ прославился исцелениями во время свирепствовавшей чумы в 1771 году. С этого времени икона стала особо чтиться верующим народом, и ежегодно 18 июня перед чудотворным образом совершались молебны. В канун праздника на три дня икона спускалась со стены и переносилась в особый шатер, куда стекались многочисленные верующие для молитвенного поклонения образу Божией Матери. По истечении трех дней икону опять поднимали над воротами, где она оставалась до 18 июня следующего года.
Особенностью иконы является изображение на ней, кроме Спасителя и Божией Матери, предстоящих святых угодников Божиих: святителей Петра, Алексия, Ионы и Филиппа, митрополитов Московских, блаженных Василия и Максима, преподобной Параскевы, святителя Василия Великого, апостола Петра, Алексия, человека Божия, апостола Симеона, сродника Господня, мученицы Параскевы и преподобномученицы Евдокии.